Sınamalı olduğunuz 3 fərqli mürəbbə resepti

Mürəbbə çay süfrələrinin sevilən dadlarından biridir. Hər meyvənin özünəməxsus ətri və dadı mürəbbəyə fərqli çalarlar qatır. Bəzən isə gündəlik istifadə etdiyimiz ərzaqlarla hazırlanan qeyri-adi reseptlər də süfrəyə yenilik gətirir. Bəs bu dəfə klassik seçimlərdən bir qədər fərqlənərək yeni dadlar sınamağa nə deyirsiniz? “Araz”da tapa biləcəyiniz ərzaqlarla hazırlaya biləcəyiniz 3 fərqli mürəbbə reseptini sizin üçün bir araya gətirdik. Gəlin, bu fərqli dadlara birlikdə nəzər salaq.

Pomidor mürəbbəsi

Ərzaqlar:

• 1,5 kq pomidor 
• 1,25 kq şəkər 
• 1,25 stəkan su 
• ½ limonun suyu 
• 3-4 ədəd mixək

Hazırlanması:
Pomidorlarını yuyub qabıqlarını soyun və iri hissələrə doğrayın. Şəkəri və suyu qazana əlavə edib şəkər tam həll olunana qədər qarışdıraraq şərbət hazırlayın. Pomidorları şərbətə əlavə edib orta odda bişirməyə başlayın. Üzərinə mixəkləri əlavə edin və mürəbbə qatılaşana qədər bişirin. Sonda ½ limonun suyunu əlavə edib bir neçə dəqiqə də qaynadın. Hazır mürəbbəni ocaqdan götürüb soyuduqdan sonra bankalara doldurun.

Kivi mürəbbəsi

Ərzaqlar:

• 2 kq kivi 
• 2 kq şəkər 
• 2 stəkan su

Hazırlanması:
Kivilərin qabığını soyub dairəvi və ya yarımdairəvi şəkildə doğrayın. Doğranmış kivini şəkərlə qarışdıraraq bir müddət saxlayın ki, öz şirəsini buraxsın. Daha sonra üzərinə su əlavə edib qazanı ocağa qoyun. Qarışığı orta odda, kivilər yumşalıb şərbət qatılaşana qədər bişirin. Hazır olduqda ocaqdan götürüb soyumağa buraxın.

Fıstıqlı karamel mürəbbəsi

Ərzaqlar:

• 200 ml qaymaq 
• 1 stəkan şəkər tozu 
• 200 q yerfıstığı 
• 50 q kərə yağı 

Hazırlanması:
Şəkər tozunu qazana əlavə edib orta odda əridin. Şəkər karamel rəngi aldıqda kərə yağını əlavə edib qarışdırın. Ardınca qaymağı yavaş-yavaş tökərək qarışdırmağa davam edin. Qarışıq hamar hala gəldikdə yerfıstığını əlavə edin və bir neçə dəqiqə birlikdə bişirin. Hazır qarışığı ocaqdan götürüb soyuduqdan sonra servis edin.

Mürəbbənin qoxusu da dad qədər vacibdir

Mürəbbənin dadını yalnız istifadə olunan məhsul müəyyən etmir. Mixək, darçın, vanil və limon kimi əlavələr onun qoxusunu və ümumi dad hissini dəyişə bilər. Buna görə eyni meyvədən hazırlanan mürəbbə fərqli ədviyyatlarla tamam başqa təəssürat yarada bilər.

Fərqli dadlarla süfrənizi rəngləndirin

Mürəbbə hazırlayarkən fərqli dadlara şans verməklə çay süfrənizə yeni bir rəng qata bilərsiniz. Təqdim etdiyimiz reseptlər arasından zövqünüzə uyğun olanı seçərək sınaya bilərsiniz. Sadə ərzaqlarla hazırlanan bu mürəbbələr sizin və sevdiklərinizin yeni sevimli dadına çevrilə bilər.