“Araz” supermarketlər şəbəkəsi müştərilərini təzə və təravətli kənd təsərrüfatı məhsulları ilə təmin etmək üçün “Tarladan rəfə” strategiyasına uyğun fəaliyyət göstərir. Belə ki, bu strategiya çərçivəsində kənd təsərrüfatı məhsulları yerindəcə fermerlərdən alınır və mağazalara çatdırılır. Bununla həm fermerlərin vaxt və pul sərf etməsinin qarşısı alınır, həm də keyfiyyətli, təzə meyvə-tərəvəz münasib qiymətlərə alıcılara təqdim edilir. Strategiyanın əsas faydalarından biri də fermerlərlə qurulan birbaşa və şəffaf əməkdaşlıqdır. Gəlin bu əməkdaşlığın fermerlər üçün necə faydalı olduğunu onların dilindən eşidək.
“Araz”la əməkdaşlığımızın davamlı olmasını arzulayırıq”
“Tarladan rəfə” strategiyası əsasında fəaliyyət göstərən “Araz” kənd təsərrüfatı məhsullarını tarladan birbaşa mağazalara çatdırır. Şirkət bu strategiya çərçivəsində yerli fermerləri dəstəkləyir, onların öz məhsullarını bazara çıxarmaq imkanlarını asanlaşdırır, yerli məhsulların satışına töhfə verir.
“Araz” supermarketlər şəbəkəsinə məhsul tədarük edən və bu uğurlu əməkdaşlıqdan məmnun olan fermerlərdən biri Beyləqan rayon sakini İsfəndi Arifovdur. Fermer əsasən üzüm, nar və tərəvəz istehsalı ilə məşğuldur: “Əkin sahəmizin 20 hektarını üzüm bağı, 186 hektarını isə nar bağı təşkil edir. Meyvə və tərəvəz təsərrüfatı ilə də məşğul oluruq. 40 hektarlıq sahəmizdə kələm, pomidor, xiyar, qırmızı çuğundur əkirik”.
İsfəndi Arifov “Araz” supermarketlər şəbəkəsi ilə 2024-cü ildən əməkdaşlıq etməyə başlayıb:
“Əməkdaşlığımızı uğurlu hesab edə bilərəm. İşimizi birlikdə çox rahat və düzgün şəkildə qurmuşuq. Şirkət öncədən sifarişini edir, hansı məhsuldan nə qədər həcmdə lazım olduğunu bizə bildirir. Məsələn, “sabaha 20 ton nar lazımdır”, – deyir, biz də ona uyğun olaraq narı yığıb, hazırlayıb, çatdırılmanı edirik. “Araz” supermarketlər şəbəkəsi ilə əməkdaşlığımızın davamlı olmasını arzulayırıq.
Şirkətin rəhbərliyinə belə planlı və rahat əməkdaşlığa şərait yaratdığına görə dərin təşəkkürümüzü bildiririk.”
“Araz”la əməkdaşlıq sayəsində məhsullarımız birbaşa tarladan rəfə çatdırılır”
“Araz” supermarketlər şəbəkəsi ilə uzun müddətdir sıx əməkdaşlıq edən meyvə-tərəvəz tədarükçülərindən biri Şəmkir rayon sakini Samir Piriyevdir. O, 10 ildir ki, kənd təsərrüfatı ilə məşğuldur: “40 hektardan ibarət meyvə bağım var. Əsasən gilas, ərik, nektarin, heyva, çiyələk yetişdiririk. Meyvə ilə yanaşı, tərəvəz tədarük edirik. Belə ki, 10 hektardan ibarət istixanamız fəaliyyət göstərir. Rəngli xarici bibərlər, “Çarliston” bibərləri, xiyar, pomidor məhsulları yetişdiririk”.
S. Piriyev 5 ilə yaxındır ki, “Araz”la əməkdaşlıq etdiyini deyir:
“Əminliklə qeyd edə bilərəm ki, bu əməkdaşlıqdan olduqca razıyıq. Çünki “Araz” bizim işimizi asanlaşdırdı.
Yetişdirdiyimiz məhsulu aparıb bazarda satmağa vaxtımız olmur. “Araz”la əməkdaşlığın üstünlüklərindən biri də odur ki, əvvəlcədən bizdən alınacaq məhsulun həcmi barədə məlumat verirlər, həmin məhsullar yığılır, qablaşdırılır və səliqəli şəkildə birbaşa mağazalara çatdırılır. Belə olduğu halda vaxt sərf edib özümüz müştəri axtarışında olmuruq, məhsullarımızın çatdırılması prosesinə də pul sərf etmirik. Həmçinin yetişdirdiyimiz məhsullar qalıb xarab olmur, “Araz” supermarketlər şəbəkəsi tərəfindən bizdən alınır. Nəticədə, maddi və mənəvi zərərlərimiz olmur. “Araz”la əməkdaşlqı sayəsində məhsullarımız tarladan birbaşa rəflərə çatdırılır. Fermerlərə göstərdiyi dəstəyə görə “Araz”a minnətdarlığımı bildirirəm.”
