"Araz" supermarketlər şəbəkəsi, Ekologiya və Təbii Sərvətlər Nazirliyi, "Təmiz Şəhər" ASC və DOST İnklüziv İnkişaf və Yaradıcılıq Mərkəzinin təşkilatçılığı və dəstəyi ilə həyata keçirilən "Card to Art" sosial-ekoloji layihəsi çərçivəsində Heydər Əliyev Mərkəzində açıq havada sərgi təşkil olunub.
Sərgidə istifadə müddəti başa çatmış plastik kartlardan hazırlanmış incəsənət nümunələri nümayiş olunub. Bu kartlar xüsusi toplama qutularında yığılıb və DOST Mərkəzinin əlilliyi olan üzvləri tərəfindən sənət əsərlərinə çevrilib. Əl işləri ziyarətçilər tərəfindən maraqla qarşılanıb, eyni zamanda layihə iştirakçılarına sosial inteqrasiya və yaradıcılıq potensialını nümayiş etdirmək imkanı verib.
Layihənin əsas məqsədi tullantıların yalnız atılmalı material olmadığını, əksinə yaradıcılıq və sənət vasitəsilə yeni dəyər qazanan resurs kimi təqdim olunmasını nümayiş etdirməkdir. Bu təşəbbüs həm ekoloji məsuliyyət, həm resursların səmərəli istifadəsi, həm də sosial həmrəylik kimi dəyərləri vurğulayır.
Qeyd edək ki, “Araz”ın Qutqaşınlı və Xankəndi filiallarında istifadə müddəti başa çatmış plastik kartların toplanması üçün xüsusi qutular yerləşdirilib.
