Veysəloğlu Şirkətlər Qrupuna (VŞQ) daxil olan “Araz” supermarketlər şəbəkəsinin 15 illik yubileyi münasibətilə təşkil olunan “Araz AI Challenge 2026” süni intellekt müsabiqəsinin qalibləri mükafatlandırılıb. Texnologiya, innovasiya və yaradıcılığı bir araya gətirən müsabiqə süni intellektin kreativ sahələrdə tətbiqini təşviq etmək, istedadlı şəxslərin potensialını üzə çıxarmaq və onlara öz bacarıqlarını nümayiş etdirmək imkanı yaratmaq məqsədi daşıyıb.
Tədbirdə çıxış edən “Araz” supermarketlər şəbəkəsinin İdarə Heyətinin sədri Rəşad İbrahimov innovativ yanaşmaların, müasir texnologiyaların və yaradıcı təşəbbüslərin əhəmiyyətinə diqqət çəkib. O bildirib ki, müasir dövrdə süni intellekt həyatın və biznesin müxtəlif sahələrində geniş tətbiq olunur, proseslərin daha səmərəli təşkilinə, yeni imkanların yaranmasına və yaradıcı potensialın inkişafına mühüm töhfə verir.
“Yurdumuzun doğma marketi” mövzusunda keçirilən müsabiqədə iştirakçılar süni intellekt alətlərindən istifadə edərək “Araz” brendinə həsr olunmuş kreativ layihələr hazırlayıblar. Müsabiqə video/animasiya, foto/vizual və audio/jingle olmaqla üç kateqoriyanı əhatə edib. İştirakçılar süni intellektin imkanlarından yararlanaraq reklam çarxları, animasiyalar, posterlər, dizayn nümunələri və musiqi kompozisiyaları təqdim ediblər.
Layihələr peşəkar münsiflər heyəti tərəfindən qiymətləndirilib. Qiymətləndirmənin nəticələrinə əsasən, hər üç kateqoriya üzrə ilk üç yerin qalibləri müəyyənləşdirilib və pul mükafatları ilə təltif olunublar.
