“Araz” supermarketlər şəbəkəsi və Ekologiya və Təbii Sərvətlər Nazirliyinin (ETSN) təşkilatçılığı ilə ilin ilk “Tullantıları hədiyyələrə dəyiş” ekoloji festivalı keçirilib. 2024-cü ildən keçirilən və vətəndaşların kütləvi iştirakı ilə baş tutan tədbirə maraq artmaqda davam edir.
ETSN, Yasamal Rayon İcra Hakimiyyəti və “Araz” supermarketlər şəbəkəsinin dəstəyi ilə təşkil olunan festival Yasamal rayonu ərazisində yerləşən “Azərsu parkı”nda keçirilib. Tədbirdə uşaqlar, gənclər, ailələr və yaşlı nəslin nümayəndələri fəal iştirak ediblər.
Tədbir çərçivəsində iştirakçılar ümumi həcmi 6968 litr plastik butulka, 1038 litr şüşə tullantı və 1776 ədəd işlənmiş batareya təhvil verərək “Araz” ekoçantaları, TAC və Bloom məhsulları, eləcə də müxtəlif hədiyyələr əldə ediblər.
Festival zamanı tullantıların təkrar emalının əhəmiyyəti, ətraf mühitin qorunması və resurslardan səmərəli istifadə ilə bağlı maarifləndirici məlumatlar təqdim olunub. Eyni zamanda interaktiv fəaliyyətlər və müxtəlif ekoloji təşəbbüslər tədbirə xüsusi rəng qataraq uşaqlar tərəfindən böyük maraqla qarşılanıb. “Tullantıları hədiyyələrə dəyiş” ekoloji festivalının keçirilməsində məqsəd əhalinin tullantıların düzgün idarə olunması barədə məlumatlandırılması, çeşidləmə vərdişlərinin təşviqi və ekoloji məsuliyyətli davranışın formalaşdırılmasıdır.
