Niderland Krallığının Azərbaycandakı səfiri Marian de Yonqun başçılıq etdiyi nümayəndə heyəti “Araz” supermarketlər şəbəkəsinin baş ofisində qonaq olub. Görüş zamanı səfir Marian de Yonq Azərbaycanda canlı və dinamik iqtisadi mühitin mövcud olduğunu vurğulayaraq Niderland şirkətlərinin ölkəmizdə təmsil olunmağa və yerli şirkətlərlə əməkdaşlığı genişləndirməyə böyük maraq göstərdiyini bildirib. O qeyd edib ki, bu baxımdan “Araz” supermarketlər şəbəkəsi ilə əməkdaşlıq mühüm əhəmiyyət daşıyır.
“Araz” supermarketlər şəbəkəsinin İdarə Heyətinin sədri Rəşad İbrahimov görüş iştirakçılarına Veysəloğlu Şirkətlər Qrupu və “Araz” supermarketlər şəbəkəsinin fəaliyyəti, inkişaf istiqamətləri və pərakəndə sektorda həyata keçirdiyi layihələr barədə məlumat verib. O, “Araz”ın beynəlxalq tərəfdaşlarla əməkdaşlığa açıq olduğunu və istehlakçılara keyfiyyətli məhsulların təqdim edilməsi istiqamətində yeni imkanları dəyərləndirdiyini bildirib.
Görüş çərçivəsində tərəflər Niderland istehsalçıları ilə birbaşa əməkdaşlığın qurulması, şirkətlərarası əlaqələrin inkişafı, biznes missiyaların təşkili məsələlərini müzakirə ediblər. Eyni zamanda, Niderlandın maliyyə institutları ilə əlaqələrin gücləndirilməsi, aparıcı Niderland şirkətləri ilə françayzinq əsaslı əməkdaşlıq imkanları ətrafında fikir mübadiləsi aparılıb.
Tərəflər bildiriblər ki, bu əməkdaşlıq Azərbaycan və Niderland arasında biznes əlaqələrinin inkişafına, qarşılıqlı ticarət imkanlarının genişlənməsinə və iqtisadi əməkdaşlığın daha da möhkəmlənməsinə töhfə verəcək.
