Veysəloğlu Şirkətlər Qrupuna daxil olan “Araz” supermarketlər şəbəkəsinin yeni APACK paketləmə müəssisəsinin açılış mərasimi keçirilib. Məmmədli qəsəbəsində yerləşən müəssisə məhsulların müasir texnologiyalar vasitəsilə gigiyenik şəraitdə qablaşdırılması və istehlakçılara daha keyfiyyətli təqdim olunması məqsədilə yaradılıb.
Açılış mərasimində Veysəloğlu Şirkətlər Qrupunun təsisçisi və baş icraçı direktoru Aydın Veysəloğlu, “Araz” supermarketlər şəbəkəsinin İdarə Heyətinin sədri Rəşad İbrahimov, “OBA” marketlər şəbəkəsinin İdarə Heyətinin sədri Natəvan İbrahimova, “Veysəloğlu Distribusiya” şirkətinin İdarə Heyətinin sədri Bəxtiyar Allahverdi, eləcə də şirkətlər qrupuna daxil olan müəssisələrin idarə heyətlərinin üzvləri və digər rəhbər şəxslər iştirak ediblər.
Ümumi sahəsi 4800 kvadratmetr olan APACK-da 52 əməkdaş çalışır. Müəssisənin əsas fəaliyyət istiqaməti gündəlik istehlak məhsullarının müasir standartlara uyğun şəkildə paketlənməsi və qablaşdırılmasıdır.
Müəssisədə şəkər tozu, müxtəlif növ paxlalılar, quru meyvələr və çərəzlər qablaşdırılır. APACK-in yaradılmasında əsas məqsəd supermarketlərdə ənənəvi olaraq çəki ilə satılan məhsulların gigiyenik şəraitdə, əvvəlcədən müəyyən edilmiş çəkilərdə qablaşdırılaraq müştərilərə təqdim edilməsidir. Bu yanaşma məhsulların saxlanılması və satış prosesində gigiyenik tələblərin qorunmasına, alış-veriş prosesinin asanlaşdırılmasına və müştəri məmnuniyyətinin artırılmasına xidmət edir.
APACK müəssisəsində qablaşdırma prosesləri avtomatlaşdırılmış avadanlıqlar vasitəsilə həyata keçirilir. Məhsullar müəyyən edilmiş çəki normalarına uyğun olaraq avtomatik şəkildə paketlənir. Müasir texnoloji həllərin tətbiqi qablaşdırma prosesində dəqiqliyin təmin olunmasına, əməliyyatların səmərəliliyinin artırılmasına və məhsulların standartlaşdırılmış formada təqdim edilməsinə imkan yaradır.
APACK-in istifadəyə verilməsi ilə “Araz” ölkəmizdə istehsal və qablaşdırma infrastrukturlarının inkişafına, texnoloji imkanlarının genişləndirilməsinə və yeni iş yerlərinin yaradılmasına töhfə verir.
“Araz” supermarketlər şəbəkəsi gələcəkdə də müasir texnologiyalardan istifadə etməklə fəaliyyət proseslərinin optimallaşdırılması, istehlakçıların ehtiyaclarına uyğun məhsulların təqdim edilməsi və xidmət keyfiyyətinin mütəmadi yüksəldilməsi istiqamətində fəaliyyətini davam etdirməyi planlaşdırır.
