Tullantıların düzgün idarə olunmasının təşviqi, təkrar emal mədəniyyətinin və cəmiyyətdə ekoloji məsuliyyət hissinin gücləndirilməsi məqsədilə “Araz” supermaketlər şəbəkəsi, Ekologiya və Təbii Sərvətlər Nazirliyinin təşkilatçılığı ilə növbəti “Tullantıları hədiyyələrə dəyiş” festivalını keçirib.
Böyükşor bulvarında təşkil olunan festivalda vətəndaşlar təkrar emala yararlı tullantıları təhvil verərək TAC və Bloom brendlərinə aid məhsullar, eləcə də müxtəlif hədiyyələr əldə ediblər.
Festival çərçivəsində ümumi həcmi 5090 litr plastik və 810 litr şüşə tullantısı toplanaraq təkrar emala yönləndirilib. Həmçinin 725 ədəd işlənmiş batareya təhvil alınıb.
Tədbirdə uşaqlar üçün əyləncəli oyunlar və müxtəlif master-klasslar da təşkil olunub. Balacalar maraqlı və əyləncəli fəaliyyətlərdə iştirak etməklə yanaşı, ətraf mühitin mühafizəsi, tullantıların çeşidlənməsi və ekoloji məsuliyyət barədə faydalı biliklər əldə ediblər.
