Şahmat üzrə Dünya Çempionu Aydın Süleymanlı ilə Veysəloğlu Şirkətlər Qrupunda görüş

Bildiyiniz kimi, 12 oktyabrda Hindistanın Mumbai şəhərində 14, 16 və 18 yaşlı şahmatçılar arasında keçirilın Dünya Çempionatında azərbaycanlı Aydın Süleymanlı birinciliyi əldə edib. Qeyd edək ki, o, Veysəloğlu MMC-nin əməkdaşı Elşən Süleymanlının oğludur.

15 oktyabrda “Veysəloğlu” Şirkətlər Qrupunun ofisində çempion və onun atası ilə görüş təşkil edilib. Görüşdə şirkətin müşahidə şurasının sədri Aydın Talıbov və digər əməkdaşlar iştirak ediblər.

Aydın Talıbov Azərbaycana çempionluğu bəxş edən azyaşlı Aydın Süleymanlını təbrik edərək, ona xoş arzularını bildirib, uğurlar arzulayıb. Azərbaycan himnini yüksək arenalarda səsləndirdiyi üçün ona təşəkkürünü bildirib.

Görüş zamanı vurğulanıb ki, yüksək intellekt tələb edən şahmat idman növündə Azərbaycanın adının ön pillələrdə çəkilməsi hər birimiz üçün böyük fəxrdir. Aydın Süleymanlının bu uğuru sadəcə onun deyil hər birimizin uğurudur.

Holdinq rəhbəri daha sonra Aydın Süleymanlıya təşəkkürnamə təqdim edib və gələcəkdə ona yeni zirvələri fəth etməyi arzulayıb.

Xatırladaq ki, ölkəmiz sözügedən Dünya Çempionatinda 9 şahmatçı ilə (5 qız, 4 oğlan) təmsil olunub. 14 yaşadək oğlanların kateqoriyasında təmsilçimiz Aydın Süleymanlı keçirdiyi 11 oyunda 9 xal toplayaraq, Dünya Çempionu adına yiyələnib.

Bu münasibətlə ölkə rəhbəri cənab İlham Əliyev və vitse prezident Mehriban Əliyeva şəxsən azyaşlı qrossmesterə təbrik ünvanlayıblar.