16.04.2021 / 00:00

Göbələk şorbası/ Şəhriyyə salatı

Ramazanda iftarını sağlam et.

Sizə iftar üçün hazırlaya biləcəyiniz, faydalı inqrediyentlərlə hazırlanan ləziz 2 yemək reseptini təqdim edirik. 

Göbələk şorbası
Tərkibi:

• 1 ədəd soğan;
• 500 q göbələk;
• 3 ədəd kartof;
• göyərti (şüyüd, cəfəri, göy soğan);
• 3 xörək qaşığı kərə yağı;
• 2 xörək qaşığı duru yağ;
• 3 xörək qaşığı un;
• 500 ml toyuq bulyonu;
• 1 litr qaynar su;
• zövqə görə duz, istiot;
• 200 ml süd;
• 1 diş sarımsaq.

Hazırlanma qaydası: 

İlk öncə soğanı xırda doğrayın. Qabığını soyduğunuz kartofu da kiçik kub formasında doğrayın. Göbələkləri isə yarım halqa şəklində doğrayın. Qazana kərə yağını və duru yağı töküb, soğanı yağda qızılı rəng alanadək qovurun. Göbələyi də soğana əlavə edib qarışdırın. Göbələk suyunu saldıqda üzərinə unu əlavə edib tez qarışdırın. Daha sonra üzərinə toyuq bulyonu, su və kartofu əlavə edib bişirin. Şorba qaynamağa başladıqda duz və istiotu tökün. Qazanın qapağını bağlayıb vam odda yarım saat qaynadın. Qaynayan şorbaya süd də əlavə edib 15 dəqiqə daha qaynadın. Ən sonda rəndələnmiş sarımsaq və xırda doğranmış göyərtini əlavə edib qarışdırıb ocaqdan götürün. Hazır şorbanı isti halda süfrəyə verə bilərsiniz.

Şəhriyyə salatı

Tərkibi:

• 2 stəkan arpa şəhriyyə;
• 2,5 stəkan su;
• 2 xörək qaşığı duru yağ;
• 1 ədəd közlənmiş qırmızı bibər turşusu;
• 5 ədəd xiyar turşusu;
• 3 yemək qaşığı konservləşdirilmiş qarğıdalı;
• 2 yemək qaşığı doğranmış şüyüd;
• 1 yaşıl soğan;
• 1.5 ədəd limon;
• 1 yemək qaşığı narşərab;
• 1 çay qaşığı duz;
• 1 kiçik qaşıq istiot;
• 2 yemək qaşığı zeytun yağı. 

İsitdiyiniz tavaya duru yağı əlavə edib arpa şəhriyyələri tavada qovurun. Zövqə görə 2 və ya 5 dəqiqə qovurmaq yetərli olacaqdır.
Ardınca, isti su əlavə edib yaxşıca qarışdırın. Qarışdırmasanız şəhriyyələr yapışa bilər. Qapağını örtüb, suyunu çəkməsini gözləyin, suyunu çəkdikdən sonra dəmlənməsi üçün qapağı örtərək altını söndürün. 
Xiyar turşusunu və qırmızı bibəri kub şəklində doğrayıb geniş bir kasaya qoyun. İncə-incə doğradığınız yaşıl soğanları, şüyüt və konservləşdirilmiş qarğıdalını əlavə edin. Hazırladığınız qarışımı tavadakı şəhriyyənin üzərinə əlavə edin. Duz, istiot, limon suyu, nar şərabı və zeytun yağını əlavə edin və yaxşıca qarışdırın. Salatınız hazırdır.

Nuş olsun!

Bölüşmək