Partnyor ol
26.05.2022 / 00:00

Yaya sağlam başlayın

Yay öz rəngarəngliyi, al-əlvanlığı və isti havaları ilə birlikdə gəlir!
Amma yay yaxınlaşdıqca xüsusilə xanımları təlaşa salan bir məsələ ortaya çıxır: artıq çəki. 
Əslində, birdəfəlik diyetlərdən yararlanmaq yerinə düzgün və balanslı şəkildə qidalansanız həm itirdiyiniz çəki uzunmüddətli olacaq, həm də daha sağlam bədənə sahib olacaqsınız. Lakin bu, çox yaxınımızda olan yay üçün uzun prosesdir və həqiqətən də, sağlamlığa zərər verməyən diyetlər sizə çəki atmaqda çox kömək olacaqdır. Diyetə motivasiyalı başlamağınız üçün sizin 2 şeyə ehtiyacınız var: 1. Dayanıqlı iradə. 2. Supermarketlərdə şirniyyat rəflərini gəzmək əvəzinə meyvə-tərəvəz və ət rəflərinin yanından daha çox keçmək.
Uzun diyet axtarışlarınızda bir az da olsa sizin işinizi asanlaşdırmaq üçün məşhur 3 diyeti bu bloqda bir araya gətirdik. Bloqu oxuduqdan sonra daha çox məlumat alaraq özünüzə uyğun olanı seçə bilərsiniz.
1.    Ketogenik pəhriz.
Bəlkə də hazırda olduqca çox istifadə olunan bu diyet haqqında eşitməyən yoxdur. Ketogenik sözünün mənbəyi ketoz sözündən gəlir və bədənin enerji mənbəyi üçün karbohidrat əvəzinə yağ istifadə etdiyi metabolik bir haldır. Gündəlik karbohidrat qəbulunu azaltdığınızda, bədəniniz hüceyrələr üçün əsas enerji mənbəyi olan qlükoza əvəzinə keton istifadə etməyə başlayır. Bu diyet zamanı demək olar ki, karbohidrat, yəni un məmulatları, şəkərli qidalar qəbul etmirsiniz. Nisbətən az miqdarda zülallı qidalar, əsas isə tərkibində faydalı yağlar olan qidalara üstünlük verirsiniz. Zeytun yağı, kərə yağı, kokos yağı, qaymaq, avokado, zeytun, çərəzlər və s. kimi qidalar bu diyet üçün idealdır. Tərəvəzlər qəbul edərkən karbohidrat miqdarının aşağı olmağına diqqət etməlisiniz. Məsələn, göyərtilər, brokoli, göbələk, gül kələmi, kələm, xiyar kimi tərəvəzlər bu diyetə uyğundur. 
2.Karatay diyeti
Türkiyəli məşhur diyetoloq Canan Karatayın adı ilə bağlı olan diyet çəki atmaq istəyən hər kəsin sevilən pəhriz üsullarından biridir. Bu diyetin özünəməxsus qaydaları var. 
-    Səhər yeməyində qətiyyən karbohidrat yeməyib zülal ilə qidalanmaq. Yumurta sizin xilasediciniz olacaqdır.
-    Gündə 2 dəfə yemək yeyib bacardıqca qəlyanaltıdan qaçmalısınız.
-    Təbii zeytun yağı və kərə yağı istifadə edib günəbaxan ilə qarğıdalı yağına rasionda yer verməməlisiniz. 
-    Yeməkləri aşağı temperaturda uzun müddət bişirməlisiniz.
-    Hər gün qeyd-şərtsiz 2-3 litr su qəbul etməlisiniz. 
-    Mütləq şəkildə idman ilə məşğul olmalısınız.
Bu diyeti yerinə yetirdiyiniz zaman tez bir zamanda çəki atacaqsınız.
3. Dukan diyeti
Dr.Pierre Dukanın zülal əsaslı pəhriz və arıqlama sistemi kimi tanınan Dukan pəhrizi dörd mərhələdən ibarətdir. Bu pəhrizə prioritet sırasına görə "Hücum" ilə başlayırsınız və "Çəki itirmək", "Qorumaq" və "Davamlı" mərhələsi ilə davam edirsiniz. Bu diyetin ən vacib xüsusiyyətlərindən biri bol su içərək arıqlamaqdır. Dukan pəhrizinin “Hücum” mərhələsində zülal ilə zəngin qidalara üstünlük verməlisiniz. Bu qidalar tamamilə yağsız süd məhsulları, balıq, yumurta və müxtəlif quş ətlərindən (toyuq, hind toyuğu, bildirçin və s.) ibarət olmalıdır. İkinci mərhələdə isə əvvəllər yediyiniz qidalara badımcan, brokoli, kələm, kərəviz, balqabaq, göbələk, kahı kimi tərəvəzlər əlavə edə bilərsiniz. Üçüncü mərhələdə hər gün həm ət, həm də tərəvəz yeyə bilərsiniz. Davamlı mərhələsində bunu özünüz üçün bir həyat tərzi halına gətirirsiniz, lakin hər cümə axşamı hücum mərhələsindəki rasionu tətbiq edirsiniz. Dukan pəhrizinin ən yaxşı tərəfi hər şeyin həftədə 2 dəfə sərbəst olmasıdır.

Ümid edirik ki, yaya sağlam və gözəl başlamağınızda cüzi də olsa, sizə bir faydamız olmuşdur.
Həmişə sağlam və gözəl qalın! 

Bölüşmək